കാട്ടിലെക്കിളീ നിന്റെ പാട്ടെന്നു ഞാൻ കേൾക്കുമീ-
ക്കാട്ടുതേൻ മധുരം എന്താണു? നിൻ കരച്ചിലോ?
കൂട്ടുകാരിയേ പ്രേമപൂർവം നീ പഴം തിന്നാൻ ,
കാട്ടാറിൽക്കളിക്കുവാൻ പുണരാൻ വിളിപ്പതോ?
വാനത്തെച്ചുംബിക്കുന്ന മരങ്ങൾ, ചുറ്റിച്ചുറ്റി-
ച്ചൂഴുന്നവല്ലിക്കൂട്ടം, സ്വാദുള്ള പുൽപ്പൊന്തകൾ,
പുലികൾ ഇളംമഞ്ഞക്കാവിയിൽ തവിട്ടിലും
കറുപ്പക്ഷരങ്ങളാൽ കാടിനെപ്പകർത്തുവോർ
എത്ര പൂവുകൾ മുൻപുകാണാത്ത നിറങ്ങളിൽ
എത്രയോ സുഗന്ധങ്ങൾ ,എങ്കിലും മനുഷ്യർക്ക്
പെട്ടിയാണിഷ്ടം….വളരാത്ത നിർജീവം വൃക്ഷം.!
മണ്ണിന്റെ നീരൂറ്റുന്ന പുതു യൂക്കാലിക്കൂട്ടം ,
കണ്ണിന്നിന്നതും വെറും പച്ചപ്പാണെന്നോ?
കാട്ടാറുകൾ,ചോലകൾ,വഴിക്കുളം കിണറും വറ്റു-
ന്നതിൻ നേരറിഞ്ഞാണോ കാട്ടുകിളി നീ കരയുന്നൂ?
Be the first to write a comment.