ഗൗരി ലങ്കേഷിന്റെ കൊലപാതകം – പ്രതിഷേധ പ്രസ്താവന

മുതിർന്ന മാധ്യമപ്രവർത്തകയും ആക്ടിവിസ്റ്റുമായ ഗൗരി ലങ്കേഷിനെ വെടിവെച്ചു  കൊന്നു എന്ന വാർത്ത  ഞെട്ടിക്കുന്നതാണ്. വർഗ്ഗീയതയ്ക്കും മാഫിയ രാഷ്ട്രീയത്തിനും അഴിമതിയ്ക്കുമെതിരെ  അവർ എടുത്ത ശക്തമായ നിലപാടാണ് ഈ കൊലയ്ക്ക് നിദാനം എന്ന് ഒറ്റനോട്ടത്തിൽത്തന്നെ അനുമാനിക്കാവുന്നതാണ്. ഗോവിന്ദ് പൻസാരേയ്ക്കും നരേന്ദ്ര ഢബോൽക്കർക്കും എം.എം. കൽബുർഗ്ഗിയ്ക്കും ശേഷം ഇത്തരത്തിൽ നാലാമത്തെ കൊലപാതകമാണ് വളരെക്കുറഞ്ഞൊരു കാലയളവിൽ നടക്കുന്നത് എന്ന വസ്തുത പേടിപ്പിക്കുന്നതാണ്. മനുഷ്യാവകാശങ്ങൾക്കും മതനിരപേക്ഷതയ്ക്കും അഭിപ്രായസ്വാതന്ത്ര്യത്തിനും വേണ്ടി ശബ്ദിക്കുന്നവർക്കുനേരേ കൊടിയ ആക്രമണങ്ങൾ ഉണ്ടാകുന്നതിനെതിരെ  വമ്പിച്ച പ്രതിരോധവും ജനരോഷവും ഉണ്ടായില്ലെങ്കിൽ ഭാവി ഇരുട്ടിലാകും.

ഗൗരി ലങ്കേഷിന്റെ കൊലപാതകത്തിൽ ഇ. ഞാറ്റുവേല എന്ന സാംസ്ക്കാരിക കൂട്ടായ്മ  പ്രതിഷേധിക്കുന്നു. അവരുടെ കൊലപാതകികളെ എത്രയും പെട്ടെന്ന് കണ്ടെത്തണമെന്നും  നിയമത്തിന് മുന്നിൽ കൊണ്ടുവരണം എന്നും കർണ്ണാടക മുഖ്യമന്ത്രിയോടും ആഭ്യന്തര മന്ത്രിയോടും  ഇന്ത്യയിലെ പൗരർ എന്ന നിലയ്ക്ക് ഞങ്ങൾ ആവശ്യപ്പെടുന്നു. ഈ പ്രതിഷേധത്തോടൊപ്പം  നവമലയാളിയും ചേരുന്നു. അഭിപ്രായസ്വാതന്ത്ര്യത്തിനു  ആയുധങ്ങളും ഭീഷണികളും അതിരുകൾ വരയ്ക്കുന്ന കാലത്ത് നവമലയാളിയുടെ വായനക്കാരെല്ലാം,  ജനാധിപത്യ-പുരോഗമന വിശ്വാസികളായവരെല്ലാം ഈ  പ്രതിഷേധത്തോടൊപ്പം നിൽക്കണമെന്ന്  ആഹ്വാനം ചെയ്യുന്നു.

എന്ന്,

Comments

comments