ശവപ്പെട്ടിയുമായിട്ടാണ് അണ്ടര്‍ടേക്കര്‍ വന്നിരിക്കുന്നത് .അണ്ടര്‍ ടേക്കറുടെ ഓരോ പഞ്ചിനും“ഹൂശ്!”എന്ന ഒച്ചയുണ്ടാക്കി കബീര്‍ മുകളിലോട്ടും താഴോട്ടും ചാടി .
“ഇന്ന് മാര്‍ക്കറ്റ് ഡൌണ്‍ ആണോ ?”
“നോ മോം ,സ്റ്റെഡി “
ലാപ്പ്ടോപ്പ് മടിയില്‍ ,കണ്ണ്‍ ടി വിയില്‍ ,മനസ്സ് വേറെങ്ങോ എന്നതാണ് കബീറിന്റെ സ്ഥിതി . അത് കൊണ്ട് തന്നെയാണ് അവന്‍ മാര്‍ക്കറ്റില്‍ നടത്തുന്ന കണക്കു കൂട്ടലുകള്‍ ഒക്കെ പിഴക്കുന്നതും .കെയ്ന്‍ അണ്ടര്‍ ടേക്കറെ ഇടിച്ചു പത്തിരിയാക്കിക്കഴിഞ്ഞിരുന്നു . അതും പോരാഞ്ഞ് അണ്ടര്‍ ടേക്കര്‍ കൊണ്ട് വന്ന ശവപ്പെട്ടിയില്‍ തന്നെ അയാളെ ഇട്ടു പൂട്ടി അതിനു തീയും കൊടുക്കുന്നു..ജെന്നി ശ്വാസം പിടിച്ചിരിക്കുകയായിരുന്നു .അയാള്‍ ശരിക്കും ചെയ്തതാകുമോ ?അണ്ടര്‍ ടേക്കര്‍ ചത്തു പോകില്ലേ ? “ഹാ ,അത് കലക്കി “കബീറിന്റെ ആഹ്ലാദം .
ലിവിംഗ് റൂമിലെ സെറ്റിയില്‍ വേരുറച്ചു പോയ ഒരു മകനും ബെഡ് റൂമിനും ബാല്‍ക്കണിക്കും അപ്പുറം ലോകമില്ലാത്ത മകളും !ഉം ,തന്‍റേത് വല്ലാത്ത വിധി തന്നെ .
കിറ്റി ഇപ്പോഴും വന്നിട്ടില്ല ,ലോണില്‍ പതിവായി കളിക്കാറുള്ള കുട്ടികള്‍ പോലും ഇല്ല ഇന്ന് .ഈ കിറ്റി ഇതെവിടെപ്പോയി ?
ഷവറില്‍ നിന്ന് വെള്ളം പെയ്യുന്ന ശബ്ദം കേട്ടു “ആരാണീ സമയത്ത് കുളിമുറിയില്‍ ?”
“ബബിത ,എന്‍റെ ഫ്രണ്ട് “ലാപ്ടോപ്പില്‍ നിന്നു കണ്ണെടുക്കാതെ തന്നെ കബീര്‍ മറുപടി പറഞ്ഞു .
“ഫ്രണ്ട് ??”
“മൈ ഗേള്‍ ഫ്രണ്ട് ,അവള്‍ക്ക് ആഫ്റ്റര്‍ സിക്സ് ഓ ക്ലോക്ക് ഒരു പാര്‍ട്ടി അറ്റന്‍ഡ് ചെയ്യണം “
“കബീര്‍ ,നീയിതെന്ത് ഭാവിച്ചാണ് ?
ജെന്നിക്ക് ദേഷ്യം തിളച്ചു .ഈയിടെയായി അവള്‍ക്ക് ബി പി വല്ലാതെ കൂടുതലാണ് .അരിശം തീര്‍ക്കാന്‍ അവള്‍ മുഷ്ടി ചുരുട്ടി ടീപ്പോയില്‍ ശക്തിയായി ഇടിച്ചു .
ലാപ്പില്‍ നിന്ന് മുഖമുയര്‍ത്തി കബീര്‍ ശാന്തഭാവത്തില്‍ ചോദിച്ചു “മോം , നിങ്ങള്‍ക്കെന്താണ് വേണ്ടത് ?”
“എനിക്കോ ?ജെന്നിയുടെ വാക്കുകളില്‍ തീ പാറി :”എനിക്കോ ?നിന്‍റെ ഫ്രണ്ട്സ് ഇവിടെ വരുന്നതൊക്കെ നിന്‍റെ കാര്യം .പക്ഷെ അവര്‍ എന്‍റെ അടുക്കളയും കുളിമുറിയും ഉപയോഗിക്കാന്‍ പാടില്ല “
“വൈ ?”
“വാട്ടര്‍ ചാര്‍ജ്ജും കറന്റ്‌ ചാര്‍ജ്ജും കൊടുക്കുന്നത് ഞാനാണ്. എനിക്കിഷ്ടമല്ല വെള്ളം പാഴാക്കുന്നത് “
കബീര്‍ ലാപ്പ് മടിയില്‍ നിന്ന് മാറ്റി എഴുന്നേറ്റു .ജെന്നിയുടെ ചെയറില്‍ കാല്‍ കയറ്റി വെച്ച് കബീര്‍ ജെന്നിയുടെ മുഖത്ത് ഉറ്റു നോക്കി .അവന്‍റെ ഉച്ഛാസത്തില്‍ ഹാന്‍സിന്‍റെയും ബീയറിന്‍റെയും സമ്മിശ്ര ഗന്ധം .”മോം ,ഇതെന്‍റെ വീടാണ്, ഇവിടെ ഞാന്‍ എനിക്കിഷ്ടമുള്ളത് പോലെ ചെയ്യും “
“അല്ല ,ഇത് നിന്‍റെ വീടല്ല. എന്നെ ഇങ്ങനെ തീ തിന്നാന്‍ വിട്ടിട്ട് കള്ളും കുടിച്ചു പെണ്ണ് പിടിച്ച് നടക്കുന്ന നിന്‍റെ തന്ത കെട്ടിത്തന്നതല്ല .ഞാന്‍ അദ്ധ്വാനിച്ചുണ്ടാക്കിയതാണ്.നീ വെറും അതിഥി.ഞാന്‍ ഇറങ്ങാന്‍ പറഞ്ഞാല്‍ ആ നിമിഷം ഇറങ്ങേണ്ട വെറും അതിഥി ” ജെന്നി ചീറി . കബീര്‍ ഒന്ന് പതറി .ആത്മവിശ്വാസമില്ലാത്ത സ്വരത്തില്‍ അവന്‍ പറഞ്ഞു ..”ഓക്കേ ഓക്കേ ,. ഐ ഷാല്‍ പേ ദി ബില്‍സ് നെക്സ്റ്റ് മന്ത് ഓണ്‍വേര്‍ഡ്സ് “
“ഹും, നീയോ, മാസാന്തം ക്രെഡിറ്റ്‌ കാര്‍ഡ്‌ ബില്ലടക്കാന്‍ എന്‍റെ പേഴ്സില്‍ കയ്യിട്ടു വാരുന്ന നീയോ?തല്‍ക്കാലം ആ പെണ്ണിനോട് എന്‍റെ പണം ഇനിയും പാഴാക്കാതെ ഇറങ്ങിവരാന്‍ പറയൂ “
കബീറിന്റെ വാതില്‍മുട്ടിനു മറുപടിയായി ഒരു തല മാത്രം ബാത്ത് റൂമിന് വെളിയിലേക്ക് നീണ്ടു .കബീറിന്റെ സെലക്ഷനെ പറ്റി പണ്ടേ ജെന്നിക്ക് അത്ര മതിപ്പില്ലെങ്കിലും, ഈ മാസം അവന്‍റെ ഡീമാറ്റ്‌ അക്കൗണ്ടില്‍ കരടികള്‍ വിളയാടുകയാണെന്ന് ജെന്നിക്ക് ഉറപ്പായി . ഇല്ലെങ്കില്‍ ഇത്ര മോശം ഒരു പെണ്ണിനെ അവന്‍ കൂടെ കൊണ്ട് വരികയില്ല! .
അസഹിഷ്ണുത വെളിവാക്കിയ ഒരു ഗോഷ്ടി കാട്ടി തല അകത്തേക്ക് തന്നെ വലിഞ്ഞു . ജെന്നിക്ക് ദേഷ്യം തീര്‍ന്നിരുന്നില്ല .കബീറിന്റെ ഭാവഭേദങ്ങളൊഴിഞ്ഞ നിശ്ചലമായ മുഖം കണ്ടാല്‍ താന്‍ ഇനിയും എന്തെങ്കിലും പറഞ്ഞു പോകുമെന്ന് ഭയന്ന് ജെന്നി ബാല്‍ക്കണിയിലേക്ക് നീങ്ങി .
റോഡില്‍ ആകെ ട്രാഫിക്‌ ജാമായിരിക്കുന്നു .അസഹ്യമായ ശബ്ദത്തില്‍ വാഹനങ്ങളില്‍ നിന്ന് ഹോണുകള്‍ മുഴങ്ങി .ഡ്രൈവര്‍മാര്‍ തല പുറത്തേക്കിട്ടു ചീത്ത വാക്കുകള്‍ വിളിച്ചു കൂവി .ചിലരൊക്കെ എഞ്ചിന്‍ ഓഫാക്കാന്‍ പോലും മെനക്കെടാതെ വണ്ടിയില്‍ നിന്നിറങ്ങിയോടി.ഫുട്പാത്തിലും പതിവില്ലാതെ തിരക്ക് കണ്ടു .എല്ലാവരും ഓടുകയായിരുന്നു . വിളക്ക്കാലുകള്‍ പോലും കൂട്ടത്തില്‍ ഓടുന്നുണ്ടെന്നു തോന്നി . ചിലരൊക്കെ അതിനിടെ വീണു . വീണവര്‍ വീണ്ടും എഴുന്നേറ്റ് ഓടി . എന്തെങ്കിലും അപകടം സംഭവിച്ച് കാണുമോ?ഏത് ചെകുത്താനെ പേടിച്ചാണ് ഇവരെല്ലാം ഒരേ ദിശയില്‍ത്തന്നെ ഇങ്ങനെ ഓടുന്നത് ?
എന്തോ പന്തികേടുണ്ട് . ജെന്നി ടി വി ട്യൂണ്‍ ചെയ്ത് നോക്കി .വാര്‍ത്താ ചാനലുകളും മറ്റ് ചാനലുകളും ഒന്നും ഇല്ല .കേബിള്‍ കട്ട്‌ ആയിരിക്കുന്നു . കടുത്ത നീലവെളിച്ചം പുതച്ച ടി വി നിശബ്ദം .എന്താണ് സംഭവിച്ചു കൊണ്ടിരിക്കുന്നത് ?
Be the first to write a comment.