[button color=”” size=”” type=”square_outlined” target=”” link=””]ചുടലപ്പറമ്പിലെ നൃത്തച്ചുവടുകൾ[/button]
നാട്ടാർ മൂടിപ്പുതച്ചുറങ്ങുന്ന ഈ നട്ടപ്പാതിരയ്ക്കും നീറേങ്കലിന്റെ ഊടുവഴികളിൽ ഇട്ടിനാൻ ചുറ്റിത്തിരിഞ്ഞു നടക്കുന്നതെന്തിന്?
പുരാവസ്തുഖനനത്തിനുള്ള ഇൻട്രാ-മോഡേൺ കോരികകൾ തോൾഭാണ്ഡത്തിലേറ്റി ഉത്രത്തിൽക്കാവുംകടന്നു തിരിയുന്നതെങ്ങോട്ട്?
അരികുചരിത്രഭാഗങ്ങൾ തോണ്ടിയെടുക്കലാണോ അവന്റെ യഥാർത്ഥ ഉന്നം? അതോ, വാറ്റുചാരായത്തിനും ഉറക്കുമരുന്നിനും കീഴടക്കാനാകാത്ത നിദ്രാവിഹീനതയെ മറികടക്കലോ?
ഏതായാലും, കാവിനു തെക്കുഭാഗത്തുള്ള ചുടലപ്പറമ്പിലേക്ക്, ഒറ്റയടിപ്പാതയിലൂടെ ടോർച്ച് മിന്നിച്ച് ഇട്ടിനാൻ മുന്നേറുന്നു. ബെഞ്ചമിൻ ഫ്രാങ്ക്‌ളിൻ, തോമസ് ആൽവാ എഡിസൺ എന്നിവർ യഥാക്രമം വൈദ്യുതി, ഇലക്ട്രിക് ബൾബ് മുതലായ കണ്ടുപിടുത്തങ്ങൾ നടത്തിയതായി ക്ണാശ്ശീരി പാഠപുസ്തകങ്ങളും ക്വിസ് മാസ്റ്റർമാരും പറയുന്നു. ഇരുട്ടിനെ തുരത്തിയ അത്തരം മഹത്തായ ശാസ്ത്രീയ നേട്ടങ്ങൾക്കുശേഷം ചുടലമാടൻ, പൊട്ടിച്ചൂട്ട്, പറക്കുട്ടി, കാളികൂളിഭൂതമറുതപ്പിശാചുക്കൾ എന്നീ സ്പീഷീസുകൾക്കു നീറേങ്കലിൽ വംശനാശം സംഭവിച്ചെന്ന യുക്തിയുടെ ധാർഷ്ട്യത്തിൽ ഇട്ടിനാൻ ശവപ്പറമ്പിന്റെ അതിരിലുള്ള ആൽത്തറയിൽ ഇരിക്കുന്നു. കൂമന്റെ മൂളൽ, വവ്വാലിന്റെ ചിറകടി, കാലങ്കോഴിയുടെ കൂകൽ എന്നിവയിനി നീലകണ്ഠൻ പരമാരയുടെ അവിവാഹിതന്റെ പ്രേതം, അജ്ഞാത സഞ്ചാരി തടുങ്ങി എഴുപതില്‍പ്പരം കുറ്റാന്വേഷണ നോവലുകളിലോ പത്തു PM-ന്റെ സീരിയലുകളിലോ നിങ്ങൾ തപ്പിയാൽ മതി. മണ്ണിരയും തവളയുംതൊട്ടു പൂത്താങ്കീരികളും അണ്ണാറക്കണ്ണന്മാരുംവരെ അതിവേഗം അപ്രത്യക്ഷമായിക്കൊണ്ടിരിക്കുന്ന സാഡിസ്റ്റ് ഹരത്തിൽ ക്ണാശ്ശീരിക്കാർ പ്രകൃതീദേവിയെ കൈകാര്യം ചെയ്തുവരുന്നു. നീറേങ്കലിലെ ചിരപുരാതനമായ ആർക്കിയോളജിക്കൽ സൈറ്റുകളിലും പുണ്യപുരാതനക്ഷേത്രങ്ങളുടെ നടയ്ക്കലും വമ്പൻ ഷോപ്പിംഗ് മാളുകൾ പണിയാൻ ധാരണയായിക്കഴിഞ്ഞു. കോടിക്കണക്കിനു വീരരായൻ കൈക്കൂലി വാങ്ങി അംശംഅധികാരിയും കൂട്ടത്തിലുള്ള കള്ളനോട്ടടി വീരന്മാരും അന്താരാഷ്ട്ര അല്ലറചില്ലറ വിൽപ്പനക്കുത്തകകളുമായി കരാർ ഒപ്പിട്ടിരിക്കുകയാണ്. കൂടാതെ, ജില്ലാജില്ലാന്തരമുള്ള ജൈവവൈവിധ്യ ബോർഡുകളും ഉടനടി പിരിച്ചു വിടുന്നതായിരിക്കും. വീട്ടുമുറ്റത്തു കരിങ്കൽ ക്വാറി വന്നാലും ആരും പരാതിപ്പെടാമെന്നു വ്യാമോഹിക്കേണ്ട.
നീറേങ്കൽമാതാമൗലികവാദികൾ ഖജുരാഹോ ശില്പവടിവിൽ സെക്സ് ടൂറിസം ഇറക്കുമതി ചെയ്യുന്നത് ഒരു കണക്കിനു നല്ലതുതന്നെ. ആൽത്തറയിൽ കിടന്ന് ഇട്ടിനാൻ ഇരുട്ടിൽ ചിന്തിച്ചു. അവരുടെ വ്യാജക്ണാശ്ശീരി ദേശീയസ്വത്വത്തിൽ വൈദേശിക മാറാവ്യാധികൾ ബാധിച്ചു പ്രത്യുത്പാദനശേഷി കുറ്റിയറ്റു പോകട്ടെ. പുനരുദ്ധാരണകലശങ്ങൾക്കു ഫലപ്രാപ്തി കിട്ടാത്തവിധം.
അരയാലിലകളിൽനിന്നും പുറപ്പെട്ട കാറ്റ് ഇട്ടിയെ ആശ്വസിപ്പിക്കാൻ ശ്രമിച്ചു. പ്രകാശവർഷങ്ങൾക്കപ്പുറം, ഉള്ളിലേക്കു പൊട്ടിത്തെറിച്ചു മരിച്ച ഏതാനും നക്ഷത്രങ്ങൾ ആകാശത്തു തിളങ്ങി. വടക്കുകിഴക്കേക്കോണിൽ ഒരു ഉൽക്കാപതനത്തിന്റെ ക്ഷണികചാപം വീശി. ആ ബഹിരാകാശപിണ്ഡം ‘ശ്ശ്… ശ് ശ്…’ എന്നു പതിച്ചത് ആർട്ടിക്ക് സമുദ്രത്തിലോ പസഫിക് കടലിലോ എന്ന് ആശ്ചര്യപ്പെടുന്നതിനിടയിൽ ഇട്ടിനാൻ ഒന്നു മയങ്ങി.
അന്നേരം…
ചുടുകാട്ടിലെ പശിമയുള്ള ഇരുണ്ട മണ്ണിനടിയിൽനിന്നും പിറുപിറുക്കലുകൾ ഉയരുന്നു. കൊട്ടക്കള്ളിച്ചെടികളിലൂടെ, കള്ളിമുൾമൂർച്ചകളിലൂടെ ആ മർമ്മരം പടരുന്നു.
നിദ്രയുടെ അതിരിനപ്പുറത്തുള്ള പ്രപഞ്ചത്തിൽനിന്നും നിങ്ങളിലെത്തുന്ന പ്രേതഭാഷണങ്ങൾ.
ഇട്ടി മയക്കം വിട്ടെഴുന്നേറ്റാൽ ,അബോധത്തിന്റെ അഗാധഖനിയുടെ ആഴങ്ങളിൽനിന്നും മരിച്ചവരുടെ വാക്കുകൾ മാന്തിയെടുത്തു ചരിത്രരേഖയുണ്ടാക്കാൻ….
ദ്രവിച്ച അസ്ഥിയുടെ കിരുകിരുപ്പുള്ള ഉച്ചാരണങ്ങൾ ഇട്ടിയുടെ ചെപ്പേടുകളിൽ ഭാവിയുടെ ഇരുണ്ട വെളിപാടുകളാകുമ്പോൾ….
ചെമ്പുതകിടിൽ നീങ്ങുന്ന നാരായമുനയിൽ നിന്നും ശവഗന്ധം ഉയരുമ്പോൾ…
ഇതാ, അവയിൽനിന്നും ചില ചുടലഭാഷണശകലങ്ങൾ.
* * * * * * * *
“ഡേയ്…തിക്കിത്തിരക്കാതെ… അല്പം നീങ്ങിക്കിടക്ക്…”
“മണ്ണിനടിയിലായിട്ടും തടിയന്റെ ശരീരബോധം വിട്ടുപോയില്ല!… നീയിപ്പം നീറേങ്കൽദേശീയവാദികൾ വെട്ടിക്കൊന്ന വെറുമൊരു ദളിത്പ്രേതമാണ്; ചാത്താ, ഓർത്തോ!”
“ചുടുകാട്ടിലും മനുസ്‌മൃതിയോ? സവർണ്ണനായതുകൊണ്ടാകാം തന്റെ ശവത്തിനു കൂടുതൽ പുഴുക്കളെ കിട്ടുന്നത്!”
“കൂട്ടരേ, മേൽജാതിക്കാരുടെ ശവക്കല്ലറകൾക്കു വലുപ്പം കൂടിയതു വെറുതെയാണോ?”
“നശിച്ച മഴ! മണ്ണാകെ അളിപിളിയായി… എന്തൊരു തണുപ്പ്!”
“ആരും വ്യാകുലപ്പെടേണ്ട. ഉത്രത്തിൽ ചുടലക്കാടിന്റെ വിസ്താരം വരുംകാലങ്ങളിൽ വിപുലമാക്കാനുള്ള പദ്ധതികൾ അംശംഅധികാരി ആലോചിച്ചുവരുന്നു.”
“അതെയതെ… കർക്കിടക വാവുബലിക്കു നീറേങ്കൽ ദേശത്തെ നാല്പത്തിരണ്ടു വാർഡുകളിലും അക്രമവിരുദ്ധമോങ്ങൽ സമാധാനറാലികൾ തല്ലിക്കൂട്ടാൻ വിദേശഫണ്ട് സമാഹരണം തകൃതിയായി നടക്കുന്നുണ്ട്. ഓരോ വാർഡിലും കൊലവിളികൾ ഉയർത്തി നൂറുകാതം മാർച്ചു ചെയ്യും.”
“പിന്നീട്, അമ്പലവാസികൾ തിങ്ങിപ്പാർക്കുന്ന തിരുനാരായണപുരം ഫ്ലാറ്റ്സമുച്ചയങ്ങൾക്കു തീവെക്കലാണ് കലാപരിപാടി.”
“അതൊരു തുടക്കം മാത്രം. മാങ്ങോട് – തോട്ടര റെയിൽവേ ലൈനിൽ ഓടുന്ന തീവണ്ടികളിൽ കയറി ന്യൂനപക്ഷം, ഒരു പക്ഷവുമില്ലാത്തവർ… എല്ലാവരെയും തലയറുക്കുന്നതായിരിക്കും.”
“കുട്ടികൾ, ഗർഭിണികൾ, വയസ്സന്മാർ… ആരെയും വെറുതെ വിടില്ല…”
“മണ്ണിനടിയിൽ ജാതിമതവർഗ്ഗശത്രുഭേദമന്യെ നമ്മുടെ രാജ്യം വളരട്ടെ.”
“ഭിന്നശേഷിയുള്ള ചെറിയ പെൺകുട്ടികളെ കൂട്ടബലാത്‌സംഗംചെയ്തു പാലങ്ങൾക്ക് ഇരുപുറവും നിരത്തി കിടത്തും. പുണ്യപുരാണ നീറേങ്കൽസംസ്കൃതിയുടെ ജയ്‌വിളികളോടെ.”
“ആ വീഡിയോദൃശ്യങ്ങൾ ചാനൽചർച്ചകളിൽ വടക്കൻ പ്രൈം ടൈം പിമ്പുകൾ വൈറലാക്കും. നീറേങ്കൽമാതാഭക്തർക്കു പോർണോമോക്ഷത്തിനു ഉത്തേജനമാകട്ടെ.”
“കരിമ്പുഴ പാളത്തിലേക്ക് ഒരു വിഭാഗത്തെ കൂട്ടംകൂട്ടമായി ആട്ടിത്തെളിച്ചു കൊണ്ടുവരുന്നത് എനിക്കിവിടെ കിടന്നു കാണാനാകുന്നുണ്ട്. ആണുങ്ങളെ മാറ്റിനിർത്തുന്നു. അമ്മമാരിൽ നിന്നും കുട്ടികളെ വേർതിരിക്കുന്നു. മുതിർന്നവരെ മുഴുവനും കഴുത്തിൽ കല്ലുകെട്ടി പുഴയിലേക്കു വലിച്ചെറിയുന്നു. ഇന്നോളം ആരും പ്രാപിക്കാത്ത പെൺകുട്ടികളെ മാത്രം ജീവനോടെ കലാപകാരികൾക്ക് വിട്ടുകൊടുക്കുന്നു.”
“സൈക്കോപാത്തുകളുടെ ശവകുടീരങ്ങൾ സോഷ്യോപാത്തുകൾ സന്ദർശിച്ചു പുഷ്പാർച്ചനകൾ നടത്തുകയാണ്. വരാനിരിക്കുന്ന കൂട്ടക്കൊലകൾക്കു ആവേശം പകരാൻ…”
“ജയിലറകളിൽ കൂടുതൽ കഴുമരങ്ങൾ നാട്ടാൻ കാര്യക്ഷമതയുള്ള പ്രൈവറ്റ് ഏജൻസികളെ അംശംഅധികാരി ഏർപ്പാടാക്കുന്നതായിരിക്കും.”
“അപ്രകാരം, നമ്മുടെ മൃതസാമ്രാജ്യത്തിനു സുവർണ്ണകാലം.. നല്ല നാളേകൾ…. മണ്ണു പിളർന്നു നമ്മുടെ മരണനഗരം പുറത്തേക്ക്… ശാഖോപശാഖകളായി… നഗരചത്വരങ്ങളിൽ, ഗ്രാമാന്തരങ്ങളിൽ, ആരാധനാലയങ്ങളിൽ, കോടതിവളപ്പിൽ, സർക്കാരോഫീസുകളിൽ , ഉദ്യാനങ്ങളിൽ… പടർന്നുപന്തലിച്ച് എങ്ങുമെങ്ങും നാം. അതത്രെ നമ്മുടെ വികസനം… ആർക്കും തടഞ്ഞുനിർത്താനാകാത്ത അഴുകലിന്റെ പുരോഗതി… പുഴുക്കൾക്കു സമൃദ്ധമായ ജാതിമതരഹിത സമൂഹസദ്യകൾ…”
“തീവെയ്പുകൾ, പട്ടാളതേർവാഴ്ചകൾ , വെടിവെയ്പുകൾ, വാതകപ്രയോഗം, ബോംബുകൾ. ഉഗ്രസ്ഫോടനങ്ങൾ… ആഹ്ഹാ… നീറേങ്കൽ ദേശീയവികാരത്തിൽ എന്റെ പൊടിഞ്ഞ എല്ലുകൾ പുളകം കൊള്ളുന്നു.”
“അറുംകൊലപാതകികൾ സിംഹാസനത്തിലേറുമ്പോൾ കൂടുതൽ കൊലപാതകികളെ ഉത്പാദിപ്പിക്കുന്ന ക്ണാശ്ശീരി ഭരണക്രമം മനുഷ്യരാശിക്കൊരു മാതൃകയാണ്.”
“തെണ്ടിപ്പെറുക്കി തിന്നു നടക്കുന്ന കോടാനുകോടി ക്ണാശ്ശീരിപരിഷകൾ നമുക്കെന്തിന്? നീറേങ്കൽ അന്താരാഷ്ട്ര കുത്തകകൾക്ക് അനാവശ്യഭാരം മാത്രം. ബോക്സൈറ്റ് ഖനനംതൊട്ടു ബാങ്കിങ് കൊള്ളസംഘങ്ങൾക്കുവരെ സദാ ഒരു ചെന്നിക്കുത്ത്. ഈ നീചവർഗ്ഗത്തെ ഒറ്റയടിക്ക് ഇല്ലാതാക്കാൻ കലാപങ്ങളല്ലാതെ മറ്റു മാർഗ്ഗമെന്ത്? വലിയ കാശു മുടക്കാതെതന്നെ ഇവറ്റ പരസ്പരം കൊന്നൊടുക്കിക്കൊള്ളും.”
“സർവത്ര ശത്രുവിനെ, അന്യനെ, അപരനെ, സംശയത്തെ സൃഷ്ടിച്ചു വിടാൻ ചാനലുകളിലും പ്രസ്സ് ട്രസ്റ്റുകളിലും സ്വല്പം വീരാരായൻ പമ്പ് ചെയ്യുക. അനുസരിക്കാത്തവരെ നാണംകെടുത്തി നാടു കടത്തുക.”
“കൂട്ടത്തിൽ റോക്കറ്റുകൾ, മിസൈലുകൾ, ആട്ടപ്പടക്കമരുന്ന് തുടങ്ങി വേറെ കച്ചവടങ്ങൾക്കും വിലപേശാം…ബാഹ്യഭീഷണികളെ വിരട്ടാനും ആഭ്യന്തരസുരക്ഷക്കും എന്ന വാചകമടി ഫേക്ക് ന്യൂസ് ഫാക്ടറികൾ അഹോരാത്രം അടിച്ചിറക്കിക്കോളും. മൂന്നു ഷിഫ്റ്റിൽ മുടങ്ങാതെ.”
“പ്രതിരോധത്തിന്റെ വ്യവസായത്തിനും സ്കോപ്പില്ലേ?”
“തീർച്ചയായും. ഡ്രോണുകൾ കരിഞ്ചന്തയിൽ തിരിമറി ചെയ്യപ്പെടും. ആർട്ടിഫിഷ്യൽ ഇന്റലിജൻസ് പ്രോഗ്രാമുകൾ സൂക്ഷ്മമാക്കിയ തീവ്രഡ്രോണുകൾ പട്ടാപ്പകൽ പാറിനടക്കും. ഏതാനും സ്വദേശികുത്തകകൊള്ളക്കാർ, അംശം അധികാരിയുടെ കൂട്ടാളികൾ, അവരുടെ വെപ്പാട്ടിഗൃഹങ്ങൾ, കുട്ടികൾ പഠിക്കുന്ന പബ്ലിക് സ്കൂൾ, വടക്ക് എങ്ങാണ്ടോ ഉള്ള വെറുപ്പ് പ്രത്യയശാസ്ത്രകേന്ദ്രം, ഒടുവിൽ അംശം അധികാരിയുടെ യോഗക്ലാസ്സിൽ വരെ അവ പാഞ്ഞുചെന്നു പൊട്ടിച്ചിതറും. ആർക്കെന്തു ചേതം! പരമാധികാരത്തിനു വേണ്ടി പരസ്പരം കടിച്ചുകീറട്ടെ. മനുഷ്യനുള്ളതു മനുഷ്യന്; പുഴുവിനുള്ളതു പുഴുവിന്; അതത്രെ നീറേങ്കലലിൽ പുതിയ പ്രകൃതിനിയമം.”
“അംശംഅധികാരി നീറേങ്കൽ പ്രജകളുടെ ഡി.എൻ.എ. ഡാറ്റാബേസ് തകൃതിയായി കെട്ടിപ്പൊക്കുന്നുണ്ടല്ലോ.”
“രാസായുധപരീക്ഷണം, മരുന്നുകമ്പനികൾക്കു ജീൻമാതൃക, വംശശുദ്ധി പരീക്ഷണം… ക്ണാശ്ശീരി പുരാതനസംസ്ക്കാരത്തിലെ ഗവേഷണസാധ്യതകൾ അനന്തമാണ് ചാത്താ!”
“യുദ്ധക്കൊതി കൂടുതലുള്ള ബീജങ്ങൾ മാത്രം വേർതിരിക്കാൻ ശാസ്ത്രജ്ഞന്മാർ അഹോരാത്രം ലാബുകളിൽ കിണഞ്ഞു പണിയെടുക്കണം. അത്തരം പ്രേമമോഹങ്ങൾക്കും കാമകേളികൾക്കും മാത്രമേ ക്ണാശ്ശീരിയിൽ നിയമസാധുതയുള്ളൂ എന്നു ഭരണഘടനാഭേദഗതി വരും. എതിർക്കാൻ ശ്രമിക്കുന്ന വിരലിലെണ്ണാവുന്ന പ്രതിപക്ഷത്തെ തിളച്ച എണ്ണയിൽ പുഴുങ്ങുന്നതായിരിക്കും.”
“ഹല്ലാ, പിന്നെ! നീറേങ്കലിൽ ജനിച്ചു വീഴുന്ന എന്തിനെന്നും ഏതിനെന്നും അറിയാത്ത എല്ലാ മുടിഞ്ഞ സന്തതികൾക്കും ആധാരം എഴുതുന്നത് എന്തുമാത്രം റിസോഴ്‌സ് വെയ്സ്റ്റ് ആണ്!”
“വരാനുള്ള നല്ല നാളെകളെ വരവേൽക്കാൻ നമുക്കൊരു പാട്ടു കെട്ടിയുണ്ടാക്കിയാലോ?”
“കൊള്ളാം… കൊള്ളാം… പോരട്ടെ കവിതകൾ!”
ചുടലപ്പറമ്പിലെ ചടുലഗാനം നിദ്രയെ അസ്വസ്ഥമാക്കുമ്പോൾ ചെപ്പേടുകാരൻ ഇട്ടിനാൻ അതാ, ആൽത്തറയിൽ ഞെളിപിരികൊള്ളുന്നു. ഉരുണ്ടുപിടഞ്ഞു നിലത്തേക്കു വീഴുന്നു.
ചുമലിൽ പുരാവസ്തുനിർമ്മാണസാമഗ്രികളുടെ ഭാണ്ഡം ചരിത്രവേതാളംകണക്കു കെട്ടിത്തൂക്കി വീട്ടിലേക്കു മടങ്ങുമ്പോൾ, ഇട്ടിനാൻ കേട്ട കാവ്യശീലുകൾ അഥവാ, രാവെളിച്ചത്തിൽ പ്രേതങ്ങളുടെ നൃത്തച്ചുവടുകൾക്കൊപ്പം ആലപിക്കേണ്ട സംഘഗാനം:
എല്ലാരും വായിക്കേണ്ട വരികളല്ല
എല്ലാരും പാടേണ്ട പാട്ടുമല്ല
എല്ലാരും ആടേണ്ട ആട്ടമല്ല
എല്ലാം മുടിഞ്ഞൊരീ ചുടലനൃത്തം.
* * ** *** ******* *********** ****** **
ആകാംക്ഷ, വിശപ്പ്, കണ്ണീർ
അണുബോംബ്, അടർന്ന തൊലി
അനീതി, നിരാശ, വിഭ്രാന്തി
അശാന്തി, രക്തത്തിന്റെ ചൂര്.
നിദ്രാടനം , വേർപാട്, ഓക്കാനം
നാശം, വഞ്ചന, ശവഘോഷയാത്ര
നിസ്സാരത, ദുരിതം, മടുപ്പ്
നിലയ്ക്കാത്ത ദുഖത്തിന്റെ മണിക്കൂർ.
അവിശുദ്ധം, ആഗ്രഹം, ചീയൽ
അട്ടഹാസം, വിക്ഷോഭം, തരിശ്
അവയവഭംഗം, രോഗം, മുഴുഭ്രാന്ത്‌
അഹങ്കാരം, ശൂന്യതയുടെ കൊടുമുടി.
നിഷേധം, ഭീകരത, മുറിവ്
നിസ്സഹായം നിലയ്ക്കും ശ്വാസം
നാമിനിയൊരിക്കലും കണ്ടുമുട്ടാത്ത
നശ്വരതയോളം യാത്രാമംഗളം.
(നീറേങ്കലിനെ മൂടുന്നു
പാതിരാവിൻ ശവക്കച്ച
നിലാവിൽ തിളങ്ങുന്നു
ചുവന്ന ചെന്നായ്‌നോട്ടം.)
ഒരുത്തന്റെ പിടച്ചിൽ കാണാൻ
ഒട്ടേറെപ്പേർ തിക്കും മൈതാനം
കൊലയാളിയും കോമാളിയും
കൂട്ടിക്കൊടുപ്പുകാരനും നീ തന്നെ.
ആത്മഹത്യയുടെ ആഘോഷം, ക്രൂരമാം
ആർപ്പുയരും വെറിക്കൂത്ത്, ഭയം
അധികാരത്തിൻ ആനന്ദമായെങ്ങും
ആയിരമായിരം പിഞ്ചുമരണം.
പുഴുക്കൾ കരണ്ട മാംസം, അട്ടകൾ
പുളയും തലയോട്ടി, കൺകുഴിയിൽ
പത്തിവിടർത്തും പാമ്പുകൾ, ഞണ്ടുകൾ
പറ്റിയിരുന്നു രാകും എല്ലുകൾ.
മോക്ഷമാർഗ്ഗമേതുമില്ലാതെ
മരണാനന്തര ജീവിതം
കബന്ധങ്ങളൊഴുകിച്ചേരും
കരിമ്പുഴയുടെ നീർച്ചുഴികൾ.
നീറേങ്കൽ പെരുവഴിയിൽ
നിലയ്ക്കാതെ പരസ്പരം
കടിച്ചുകുടയും പട്ടികൾ
വിഴുങ്ങും മനുഷ്യർ.
എന്തിനുമേതിനും മീതെ
പെരുകുന്നു പുഴുക്കൾ
പുറപ്പെടുകീ പാതിരാവിൽ
പ്രതിക്ഷണം ചെറുക്കാൻ.
നീറേങ്കൽ തകർച്ചയേക്കാൾ
നീറിക്കത്തുമീച്ചുടലയിൽ
നിന്റെ കുഞ്ഞിന്റെ ജഢം
നീതിമാത്രമാണിനി മാർഗ്ഗം.
അപ്രാപ്യമല്ലാത്ത സാഹോദര്യം
അപരിചിതരുടെ സൗഹാർദ്ദം
ചേർച്ചയില്ലാത്തതെല്ലാം ചേർത്തു
സ്ഫോടനം തീർക്കും കവിത.
പാട്ടുകാരനാണിപ്പോൾ കൂട്ടത്തിൽ
പ്രയോജനമുള്ള ഒരേയൊരാൾ.
അവന്റെയീരടിയിൽ എല്ലാരും
ചേർന്നെഴുതി തുടരേണ്ട കാവ്യം:
‘അവമതിയില്ലാതെ പൂർണ്ണത പ്രാപിക്കാൻ
ആളുകൾ കൂടേണം..ആയുധമേന്തേണം.. ‘
—————————-
നീറേങ്കൽ മുൻ ചെപ്പേടുകൾ:
Be the first to write a comment.